Suliffissuit nutaat
Kalaallit Nunaata nunavittaa suliffissuaqalernissamut tunngavissiisinnaagunarpoq siunissaq ungasinnerusoq eqqarsaatigalugu aalisarnermik inuussutissarsiuteqarnerup pingaarutaanut nallersuunneqarsinnaasumik imaluunniit allaat tamatumunnga akimuisinnaasumik taamatullu suliffissaqartitsiniarnerup avammullu tunisassiornermik inuussutissarsiuteqarnerup tungaasigut nunamut pingaaruteqartussamik.
Uuliap, gassip aatsitassallu akiisa qaffariartornerisa nassataraat tunisassianik taama ittunik iluaqutiginninnialernissamut nunarsuarmi sumiluunniit soqutiginninnerup annertusiartornera. Peqatigisaanik soqutiginninneq pissuteqarpoq tunisassianik tamakkuninnga tutsuiginartumik pilersuinerit qularnaarneqarnissaat pillugu kissaateqarnermik.
Silap pissusiini allannguutit qularnanngitsumik atortussiassanik nassaarniarnermut qalluinissamullu sunniuteqarluarumaarput. Sermersuaq aakkiartortillugu aatsitassaqarfinnik misissuiniarnissaq iluaqutiginninniarnissarlu pisariinnerulersussaapput.
Suliffissuarnik nutaanik piorsaaviginnissinnaanermi ilaatigut aamma qiviarneqassaaq nukissiuutinik sakkortuunik, Kalaallit Nunaanni – nunarsuarmilumi tamarmi - avatangiisinut iluaqusiisinnaasunik, pingaartumik erngup nukinganik, atuisinnaaneq, Aluminiumut aatsitsiviliorfissamik pilersaarutit tamatumani pingaarnerpaatut assersuutissaapput.
Kiisalu pingaarutilittut suliniuteqartoqarpoq nukinnik issittuni pissutsinut naleqqussakkanik qalluinnissaq iluaqutiginninnissarlu pinerullugit arktisk teknologi-mik taaneqartumik ineriartortitsiniarnermi Kalaallit Nunaata sallersaanissaa siunnerfigalugu.