Upernaviarsuk
Misiligaavik
Upernaviarsummi misiligaavik Kalaallit Nunaata Namminersortup misiligaanikkut nunaateqarfigaa nunalernermillu inuussutissarsiuteqarnissamut atuarfiutigalugu.
Kusassaatitut naatsiiviit assigiinngitsut
Qangaaniilli kalaallit illui naatsiiveqarsimanngillat. Ukiunili kingulliunerusuni kusassaatitut naatsiiviit nalinginnaanerulersimapput. Naatitanut nerisassiornermi atugassanut nammineerluni naatitsiviusartunik naatsiiveqarneq qaqutigoortorujussuuvoq. Tamanna pissuteqarunarpoq pisiniarfiit naatitanik amerlaqisunik tuniniagaqartarnerannik.
Upernaviarsummi misiligaavik
Upernaviarsummi misiligaavik Kalaallit Nunaata Namminersortup misiligaanikkut nunaateqarfigaa nunalernermillu inuussutissarsiuteqarnissamut atuarfiutigalugu. Misiligaavik Qaqortup kangiani 7 km-it miss. Ungasissulimmiippoq, nunaateqarfimmut tassanngaanniillu assartuineq tamarmi angallammik ingelanneqartarpoq. Piffik pineqartoq kangerlummut pularissap silarpasissuaniippoq ukiuunerani sikuneq ajortutut kangerlulimmi, upernaakkulli sikorsuaqarajuttumi.
Suliaqarfigisat
Nunalerinermi misiligaanerit aamma issittuni piffinni kialaarnerusuniit nillataarnerusunut nunaleriveqarfiusinnaasuni nunalerineq ilinniartitsissutaasarpoq. Suliaqarfigisat tamalaanut tunngassuteqarsinnaapput, uumasuuteqarneq taamatullu naasunut naatitsiveqarneq aamma ilanngullugit.
Savaateqarnerup sammineqarnera
Uumasuuteqarnerup iluani aningaasarsiornikkut sunniutilimmik savaateqarneq sammineqarusarpoq. Tamatumunnga atatillugu aaqqissuussamik savaateqarnerup inerisaaviginiarnissaa, tamatumani islandimiut savaateqarnermik ingerlatsinissamut najoqqutassiaat Fjarvis sungiusaatitut atorlugu,sulissutigineqarpoq. Tamatuma saniatigut nerukkaatissatigut savanik misiligaanissaq sulissutigineqassaa. Aamma misiligaavimmi nersussuaatit hestiutillu amerlannginnerusut pigineqarput ilin-niartitsinermi atorneqarnissaat eqqarsaatiginerullugu. Immulinnik nersussuarnik miisiligaanissamik pilersaarutaasut immulerffeeqqatullu pilersaarut killissaat aalajangernagu kinguartikkallarneqarput, aningaasalersuutissanik amigaateqarneq pissutigalugu.
Naasunut naatsitsarfeqarnermi misiligaaneq
Naasunut naatitsisarfeqarnerup tungaatigut misiligaataassapput ivikkat ukiuni arlalinni qerinatik ukiisinnaasut pissuseqatigiiaat assigiinngut ivikkanik nerukkaatissiornissaq naatitanillu matoorlugit nerukkaatissamaatigut toqqorterisarnissaq siunertaralugit kiisalu nerukkaatissatut nunami ukiuni ataasiakkaani ineritinneqarsinnaasunik soorlu karrinik, salliutillugit iffiassiassat, suaasaaqqat issingigassallu aamma ivikkat ilaat rajgræsinik taaneqartartut kiisalu qungorlertut nunami ineritaasartut ilaannik pissuseqatigiiaanik misiligaasoqssaaq.
Aammattaaq arlaleriarluni misiligarneqartarput misiligaaviup naatsiivilerisarfiani naasulerinermillu ilinniartitsineq naatitanik nalinginnaasumik naatsitsisarneq naatsiivilerinerlu; ilanngull. naasut ukiut arlerlugit naatsiivinni naasartut, orpikkat orpiillu inuinnaat naatsiiviini pisortatigoortumillu naatsiiviliani naatinneqartartut.
Nunalerinermut ilinniarfik
Upernaviarsummi nunalerinermut anginngitsumik ilinniarfeqarpoq, ilinniarumallutik (2008-mi ukiakkut) allatsissimasunik 16-iusunik. Ilinniartut holdenut 3-7-nik inuttalinnut avinneqartarput misili-gaavimmiittussatut, sinnerisa Kalaallit Nunaanni aamma Islandimi Norgemilu ilinniarnermut atatillugu naasorissaasuni sulineranni, holdillu marluk taakku sinnerseraattarput.
Sulisorisat
Upernaviarsummi sulisorisat katillutik sisamaapput, tassaasut nunalerinermi ilinniartitsuusoq/misilivigaammik aqutsisoq, ingerlatsinermi siulersuisoq, igasoq kiisalu naatsiivilerisutut ilinniarsimasoq.