Qeriuaannartup aannera ajornartorsiortitsisoq
Pinngortitap betonngia sequtsilerpat attaveqarfik aserortilissaaq. Sumiiffinnut allanut amerlanerpaanut sanilliullugu Issittumi angallanneq pitsaanerpaasarpoq, issittup kuussuit tatsillu qerrutsittarpai nunalu manngertisarlugu. Aasakkut nunap qeriuaannartup qallerpaava aakkaangat nunaannartaq marallunnguuttarpoq aqqutigiuminaallilluni. Suliffissuaqarnermi suliarpassuit nunakkut atortussat assartornissaat pisariaqartittuuaat.
Aqqusernit mittarfiillu
DMI-mi nalunaarut naapertorlugu kissakkiartornerata nuna qeriuaannartoq aqqusernit illullu ataanni meterit marlunnit pingasunut appakartissinnaavaa. Tamanna pippat Kalaallit Nunaanni ullumikkut nuna qeriuaannarfeqartuni aqqusernit allanngortittariaqassapput. Mittarfinnuttaaq atatillugu ajornartorsiuteqalissaaq. Aqqusernit mittarfiillu ataanni nuna immikkut eqqugaaffiuvoq, nunatammi aputitaqanngitsut manissut kissassusermik tigooraapput, taamaattumillu sanaartukkani aserorterinerujussuarnik kinguneqartarlutik.
Qalipaat qaqortoq iluaqutaavoq
Aqqusernit mittarfiillu nillorsarnissaannut teknikkikkut periarfissaqarpoq, amerlanersaalli akisungaatsiarput.
Akikinnermik aaqqiissut tassaavoq asfaltimi ujaqqat qaqqoriit akulerussuunneri, taakku seqernup qinnguaanik utertitsissapput, taamaalilluni aqqusernup nammatsisua kissanneqassanani.
Tamatumunnga iluaqutaaneranut assersuutissaavoq Kangerlussuup eqqaani mittarfik. Tamaani 2002-mi asfaltimi qaqortumik qalipaasoqarpoq, kingunerisimallugu qalipanneqanngitsunut naleqqiullugu nunap qaani qerisoq meterimik ataatsimik qaninnerusimalluni.
Illut toqqavii nakkaattut
Kalaallit Nunaanni illut amerlanerpaat qaarsortamut toqqaannartumik sananeqarsimasarput. Nunamili qeriuaannartumi sananeqarsimasut assorsuaq aserorterfiupput. Nuna qeriuaannartoq aappat toqqaviit nakkaapput illullu quppanitsiterlutik. Pituffimmi timmisartunut hangarini arlalialunni naqqoq meterit marluk tikillugit nakkaassimavoq