Aalisarneq
Inuussutissarsiutit pingaarnersaat
Aalisarneq inuussutissarsiutinit suliffissaqarnikkut nunanullu allanut tunisatigut pingaarnersaavoq. Nunanut allanut tunisanit 90 procent aalisarnermeersuuvoq. Kalaallit sulisinnaasut sisamararterutingajaat aalisartuupput, piniartuullutik aalisakkanillu suliffissuarni sulisuullutik.
Nunarsuarmi tamarmi aalisakkanik tunisassiornermi Kalaallit Nunaat normu 51-iuvoq, tunisarlugit 238.000 tonsit amerlanersaat kinguppaasut. Aamma Royal Greenland A/S’p nunarsuarmi aalisakkatigut tunisassiornerpaat qulit ilagai 700 mio. US$-ngajaat kaaviiaartitaralugit.
Kinguppaat qalerallillu pingarnersaapput
Kinguppaat, qalerallit, saarulliit assagissallu tunisanit aningaasarsiutaanerpaapput. Tunisaanerpaat pingasut pingaaqatigiingajapput: kinguppaat qalipaajagaanngitsut, kinguppaat uullugillu qalipaajakkat qalerallillu. Tulleraat assagissat, taava saarulliit taavalu allat assigiinngitsut.. Kalaallit Nunaata ukiumut tunisartagai milliardinik marlungajannik naleqartarput.
Saarullinikkaangat kinguppakillisarpoq
Imaq avannarpasissoq kissarnerulerpat saarulliit, suluppaakkat, nataarnat, qeeraaqqat/nimiit ammassassuillu iluarissavaat. Aamma eqalukkat eqalussuullu nulia avannarpassapput. Kinguppaat assagissallu imaq nerumittoq qimassinnaavaat. Immap nerumissutsimigut allannguutai annikitsut aalisagaanut malunnartorujussuusarput. Allannguutissalli nalunarallarput. Aalisagaqarneranut apeqqutaasoqaqaaq: imartani ataasiakkaani sila, uummavinni agguataarsimaneq/nerisariinneq aamma pisortat politikerillu pisassarititatigut aqutsinerat.
Taamaattareerpoq
Allannguuteqartareerpoq. Soorlu taamani 1980’kkut naalerneranni 1990’kkullu aallartinneranni saarulleerutingajallarmat aalisartut kipiluttunartuullarmata. Suerutingajassutaavoq immap 1 gradimik nillertinnera!
Kissassutsikkut allanngornerit nutaajunngillat. Ullumikkut nutaartaavoq allannguutinut pisartuartunut inuit pisooqataanerat. Ilapittuutaavorlu allannguuteerannguilluunniit assut kingunerlussinnaasarnerat.
Allanngortitereqqittariaqarsinnaavoq
Immap neruminnerulernerata kingunerisinnaavaa aalisariutit, atortut, suliffissuit il.il. allanngortiternissaat. Akerlianik imartanik aalisarfissaqarnerulersinnaavoq. Umiarsualiviit tikikkuminarsissapput, nutaanillu tunisassiornissaq periarfissinneqassaaq.
Qangatut aalisassaalerpugut
Qimussimit sikukkut aalisarneq inuussutissarsiutitut qanganngulerpoq. Oktobarimit maajimut sikumit aalisartarnerugaluaq affaannanngulerpoq, tassa decembarimit marsip naaneranut. Akerlianik umiatsiamit aalisartarneq sivitsorpoq.