Issittoq kissannerpaavoq
Nunarsuarmut tamarmut agguaqatigiissitamit marloriaammik sukkanerusumik Issittumi kissassuseq qaffassasoq siulittuutigineqarsimavoq. Issittumi allannguutit Antarktisimut naleqqiullutik aamma qaffasinnerupput, pissutaavorlu nunarsuup isuini marlunni nunatat aamma imartat agguaqatigiissinneri assigiinngitsuunerat.
Silap pissusaanik ilusiliussat piffissamut naleqqiussamut 1951-1980-imut naleqqiullugu ukioq 2100-mi Kalaallit Nunaanni kissassutsit aasakkut 1.5-3.5 °C-inik qaffariaateqassasut, ukiuunerinili 3.5-7 °C-inik qaffariaateqassallutik.
Apummit sermimillu utertitsinerup annertussusaa assut pingaaruteqarpoq
Seqernup qinnguaasa avataarsuarmut qanoq annertutigisumik uterteqqinneqartarneranik kissassutsip attuumassuteqarluinnarnera tassani nassuiaataavoq. Aput sermerlu assorsuaq qinngornernik utertitsisarput. Assorsuaq aputeqarlunilu sermeqaraangat tamatuma issinnera attattarpaa. Seqernup qinnguaasa 80 procent-iisa missaannik aput sermerlu utertitsisarpoq. Nuna imarlu aputeqaratillu sermitaqanngitsut taamaallaat 15 procent-inik utertitsisarput.
Imminik sakkortusaasoq
Assersuutigalugu illup naatsitsiviup sunniutaa pissutigalugu kissassuseq qaffariaateqarpat ileqquusumut naleqqiullugu sermip aputillu annertunerusup aalersarneranik nassataqassaaq. Taamaalippallu Seqernup qinnguai nunami immamilu akulerussuutilersarput. Sulilu kissannerussaaq, tassalu kissassutsip qaffariarnera imminik sakkortusaalertutut sunniuteqalersarpoq. Sunniut taanna soorunami sakkortunerpaasarpoq annerpaamik sermeqarlunilu aputeqarfiusimasumi, tassalu Seqernup qinnguaasa uterteqqinnerisa sakkortunerpaaffiani.
Kissaaneq suli sakkortusaqqinneqarsinnaavoq nunamit qeriuaannartumit metangassimik aniatitamit, aammali patsisaasut allat sunneeqataasinnaapput.
Kiattuusunit nillernerusunut kissarnerup takkunnera
Nunarsuarmi sumiiffinni kiattuni suli kissannerunerata issittormiunut naleqqiullugu annertunermik erngup aalannguunnerata qaffannera aamma pingaaruteqartuuvoq. Erngup aalaasa imarisaatigut assigiinngissutip sumiiffinnit kiattunit erngup aalannguunneri silaannartakkut sumiiffinnut nillernerusunukaanneqartittarpai, sumiiffinni tamakkunani erngup aalannguunneri kiammik pilersitaqarlutik.