Imaq qaffakkiartorpoq
Ukiut untritillit kingulliit ingerlanerini ukiut tamaasa nunarsuarmi tamarmi imaq 1.8 mm-it missaannik qaffattarsimavoq. Qaffariarneq sukkatsikkiartorpoq; 1993-2003-mi uuttortaanerit ukiut tamaasa 3.1 mm-inik qaffariarneq takutippaa, 2007-imilu nunarsuatta imarpiini immap 5 millimeterit missaannik qaffassimanissaa naatsorsuutigineqarpoq. Tamatumunnga Issittumit aamma Antarktisimit aakkiartortup 1 millimeter ilapittuutigaa.
Nunarsuarmi tamarmi kissakkiartuaarnerup qaffakkiartorneq tamanna suli sakkortusaqqissavaa. Kissanneruleraangat imap neruttortarmat kissakkiartornerit annertusisut immap qaffasissusaa annertusaqqissavaat, aammalu nunami sermertat aakkiartorneri pissutaapput. Ullumikkut immami kiammit neruttorsaaneq immap qaffasissusaanik annertusaanermut akisussaanerpaavoq.
2007-imit nalunaarummi kingullerpaami FN-imi silap pissusaanik Paasisimasallit, IPCC ukiumi 2100-mi imaq 18 aamma 59 centimeterinik qaffassasoq siulittuutigaat. Atuuffinnik tamanik IPCC-p naatsorsuuteqarsimannginneranik ilisimatuut allat isumaqarput. Ilaatigut sermersuarmit aakkiartorneq, aammalu immami nunamilu sikup sermillu aakkiartorneri naammaginartumik naatsorsuutigineqarsimanngillat. Nunami sermeq aattoq immamiilluni sikup aanneranut naleqqiulluni immamik annertusaanipilussuuvoq. Taamaalilluni suli immap qaffakkiartorneranut Kalaallit Nunaanneersup annertussusaa ilisimaneqanngilaq, taamaattorli assorsuaq ilisimatusarfigineqartuulluni.
Ilisimatuut ataatsimeersuarneranni oqaatsit paasinnissutissat
Immap qaffakkiartornerpiaa 2009-mi marsimi Bella Centerimi pisumi ilisimatuut silap pissusaa pillugu ataatsimeersuarneranni qitiutinneqarpoq. IPCC-p siulittutaanut kisitsisinut naleqqiullugu immap qaffariarnerunissaa ilisimatuut amerlanersaasa isumaqatigiissutigaat. Niels Bohr Instituttimit, Tuluit Nunaannit aamma Finlandimit ilisimatuut ukiunut tulliuttunut 100-nut immap meterimik ataatsimik qaffannissaa siulittuutigaat. Allalli suli annermik qaffariassasoq isumaqarput, imarpinni assorsuaq perraassuseqartoqarnera, immap allamik sunnerneqartigani uninngavimminiiginnartarnera pissutaanerarlugu. Silaannartap kissassusaani allannguutit aatsaat imarpinnut ilannguppata ukiut hunnorujorpassuit ingerlaneranni pisut ingerlaartualissapput. Qaffariaatip affaata missaa immap neruttorneranit pissaaq, affaatalu aappaa serminit iigartartunit sermersuarmillu aakkiartortunit pissalluni.
IPCC-p nalunaarusiaani tullinnguuttumi, 2014-imut pilersaarutaasumi nunarsuarmi imarpiit annertussusaat sammisani pingaarnerussaaq