Sermeq Kujalleq
Ilulissani Sermeq Kujalleq
Nunarsuup affaani avannarlermi sermini iigartartuni ilulissiornerpaaq, Sermeq Kujalleq, Kalaallit Nunaata Kitaani Ilulissat eqqaani kangerluup Kangiata ilorpiaaniippoq. 2004-mi UNESCO-p Ilulissat Kangia The World Heritage Listiumminut, Nunarsuarmi Eriagisassat Allattorsimaffiannut ilannguppaa.
Sermeq iigartartoq sukkasooq
Sermeq Kujalleq sermersuarmi sermip sarfannguuffianut sukkasuumut assersuutissaqqittuuvoq. Sukkanerujussuanut patsisaasoq tassaavoq sermip aakkiartorfissuarmeersup sarfaqarfimmi amitsumi katersuunnera. Naak sermeq iigartartoq 680 meterinik silissuseqaraluarluni aamma 7½ km-inik silitsigigaluarluni ullormut unnuarmullu 19 meterinik nikikkiartortarpoq, taamaalillunilu nunarsuarmi sermit sarfatut ittut sukkanerpaartaasut ilaannut akulerutsippaa.
Aakkiartuaarneq annertusiartortoq
Ullormut kangerlummut sermimit iigartartumit sermeq 86 mio. tonsi anillatsittarpaa. Ukiunut quliinnarnut naleqqiullugu sermeq marluk-pingasoriaatigaa. Imaluunniit ukiup ataatsip ingerlanerani illoqarferujussuup New York Cityp ullut tamaasa imermik tarajoqanngitsumik atuisarneratut.
Sermimit iigartartumit 1960-ikkunniit 2003-mut qaammataasamit assilisat sermip iigartartup kangimut 11 kilometererujussuarnik tunuarsimanera takutippaat. Ingammillu ukiuni kingulliunerusuni sermimit tassannga annertusiartortumik aakkiartuaarnera nunarsuaq tamakkerlugu kissakkiartuaarnerup sunniutaanut takussutissanngorsimavoq.
Assupilussuaq sikuartanik aammalu sukkasuupilussuunerata ilimanarsitippaa silap pissusaani allannguutinut Sermeq Kujalleq malussapallattartoq, taamaaginnartumilli aammalu sakkortuumik sukkassuseqarneranut tunngaviusut suli oqallisigineqarput.