Climate Congress
Klimamik ilisimatuut 2500-t nunanit 80-ineersut Climate Change: Global Risks, Challenges & Decisions marsip 10-annit 12-iannut ataatsimeersuaatigaat. Naggataarutitut statsminister Anders Fogh Rasmussenip nalunaarutit pingaarnerit arfinillit IPCC’p 2007-imi nalunaarutaanut tapertassaasut aamma FN’p decembarimi 2009 klima pillugu ataatsimeersuartitsinissaanut politikerinit nutaatut ilisimaligassaasut tunniuppai.
Nalunaarutit pingaarnerit arfinillit klima pillugu allattoqarfiup marsip 12-ianni 2009 tusagassiuutinut nalunaarutaa naapertorlugu imaapput:
Klimap allanngoriartornera
FN’p klima pillugu sassartitaasa IPCC-p 2007-imi nalunaarutaani kingullermi siulittuutit ajornerpaat piviusunngulerput: kissatsikkiartorpoq, immat qaffakkiartorput sermersuillu aakkiartorput. Pisut sukkatsikkiartornissaat klimallu aaqqinneqarsinnaanngitsumik allanngornissai aarlerinaqaat.
Inuiaqatigiit avissaartuunnerat
Misissuinerni kingullerni paasinarpoq klimap allanngornerinut annertunngikkaluanut inuiaqatigiit malussarissuusut. Klimap allanngorneri naapertuilluanngitsumik eqquissapput. Piitsuusut gassinillu aniatitsinnginnerpaat eqqugaanerussapput. Kissakkiartornerit 2 gradinit ingasannerusut anigoruminaatsuussapput.
Imungangaaq periusissaq
Imungangaaq eqqarsarluni massakkut iliuuseqartariaqarpoq. Taamaanngippat inuiaqatigiinnikkut aningaasaqarnikkullu akisunerussaaq. CO2 aniatitaq pimoorullugu 2020’mi millisinnianngikkaanni nunarsuarmi allanngoriartuutit suut tamaasa nassataralugit ingerlarsulersinnaapput unitsitassaajunnaarlutik 2050’imilu anguniakkat angunaveersissinnaallugit.
Naapertuilluarneq
Klimap allannguutaasa eqquinerat naapertuilluanngilaq. Taamaatumik nunat pisuut piitsuunernut aningaasalerluakkamik ikiuuttariaqarput, allannguutinut naleqqussarsinnaaqqullugit.
Peqqutissarsiortariaqanngilaq
Iliuuseqannginnissaq peqqutissaqanngilaq. Aningaasat, teknikki aqutsisullu tassaareerput periarfissaqarlutillu makkunuuna iluaqusiinissamut: ataavartumik suliffissat amerlanerusut, peqqinnissaamut aningaasartuutit ikinnerusut il.il.
Pisariusunut sillimasariaqarpoq
Massakkut naalagaaffiit piialertariaqarpaat akornutaasut, tapiissutit naapertuutinngitsut il.il. Klimap allanngoriartornerisa ilungersornartussai inuiaqatigiit sillimaffigalugillu unammillerfigisinnaassappatigit sunniutilinnik aqutsisoqartariaqarpoq.