Sermersuaq
Sermersuarmut nassuiaataavoq nuna 50.000 km²-init annertunerusoq tarajuunngitsumik sermilik. Ullutsinni assersuutissatuaavoq Antarktisimi sermersuaq. Arktis immap tarajullip sikuanit qallersimaneqarpoq.
Sermersuaq ukiuni hunnoruju-tusintilikkaani pinngoriartorpoq. Aput apummik nutaamik qallerluni naqinneqariartornermigut serminnguuttarpoq.
Sermersuaq nunarsuup affaata avannarliup nunaviisa sermerujussuisa sinneraat.
Oqaluttuarisaanermit toqqorsivik
Aputip ukiukkuutaarlugit nutaamik qallerneqartuarnera sermersuannguukkiartorsimavoq. Taamaammat ilisimatuut qilleriffigalugu ukiuni tuusintilikkaani silap pissuserisimasaanik paasisiniaaffigisinnaavaat.
Angisuupiluunersua
Sermersuup angissusia tupinnaannartuuvoq. Avannaanit kujammut 2.400 kilometerit missaat takissuseraa. Silinnerpaaffimmigut 950 km missiliorpaa 1.799.850 kvadratkilometerit siammaffigalugit, tassa Kalaallit Nunaata tamarmiulluni 85 procent-ia. Sermersuup 2,8 millioner km³-it initussuseraa. Issunerpaaffii 3,5 km-iupput, portunerpaaffialu immap qaavanit 3,2 km-inik qatsinneruvoq.
Ilulissat Sermia – kissakkiartuaarnermut ilisarnaat
Sermersuup ilaa arriitsorsuarmik kuuppoq. Sermeq nikikkiartuaaleraangat sermit iigartartut pineqalersarput. Sermersuaq immap tungaanut naqiguttuuvoq iigarnerilu ilulianngortarlutik. Nunarsuup affaata avannarliup serminik iigartartoqarnersaa Ilulissat eqqaanni kangerluup Kangiata iluaniippoq. Ukiut kingulliit ingerlanerini sermip iigartartup tamatuma nungukkiartornera nunarsuup kissakkiartuaarneranut malunnaataalersimavoq.
Sermeq aakkiartorpoq
Nunarsuaq kissakkiartuaarmat sermersuaq aakkiartorpoq. Aakkiartornera annertussusianut naleqqiukkaanni arriitsuuvoq. Qanittukkut uuttortaanerit takutippaat sermersuarmit ukiumut 239 km³ aattartoq.
Sermersuaq tamarmi aakkaluarpat Nunarsuami tamarmi immat 7 meterinik qaffassagaluarput. Taamaalisinnaanerali siunissami qaqugorsuarmiissaaq immaqaluunniit piunnarani. Allaammi Eemip nalaani, ukiut 130-110.000-it matuma siorna, Kalaallit Nunaat agguaqatigiissillugu ukiuni tusintilikkaani arlallinni ullumikkumit 5 gradit C-iusinik kiannerugaluarmat Sermersuup ullumikkut 60 procent-ini annertussuserisimavaa.