Kalaallit Nunaat aamma silap pissusaata allannguutai
Kalaallit Nunaat nunarsuaq tamakkerlugu silap pissusaata allannguutaasa oqallisigineqarnerannut atatillugu sammineqarpoq. Sermit sikullu aakkiartornerat silap pissusaata allanngoriartornerannut ersarilluinnartumik sunniutaapput aammalu silap pissusaa pillugu oqallinnermi Kalaallit Nunaata pingaarnertut sammineqarneranut peqqutaasuni pingaarnerpaanut ilaallutik.
Paasisanut aallaaviusoq
Ilisimatuut silap pissusaa pillugu paasiniaanerminni Kallaallit Nunaat tassanilu pinngortitaq aamma assigiinngitsutigut paasisaminnut aallaavigaat. Sermersuaq silap pissusaata qangaanilli allanngoriartornera pillugu paasisanut toqqorsiviuvoq. Susoqarnersorlu paasissagaanni nalitsinni klimaasup allanngorarnerisa tamatuma naasuinut uumasuinullu sunniutaat pingaarluinnarput, silammi pissusaata allanngorarneri tamaani sakkortunerummata sunniutaallu erseqqinerulluni. Misissuinermik suli atuarit.
Allanngornerit kingunissaallu
Silap pissusaata allannguutai tassaanerupput kiatsinneq silallu unerisimannginnerulernera. Kiatsikkiartorneq ilaatigut naasunut uumasunullu sunniuteqarpoq, aamma sermersuup, sermit immallu sikuata aakkiartornerat sunniutaavoq erseqqivissoq. Tamakkua tamarmik qanittumut qaqugumullu inuuniarneq sunnertussaavaat. Allanngornerit kingunissaallu suli annerusumik atuarsinnaavatit.
Pissutaasut oqallisaanerat
Silap pissusaata allanngornerisa pissutaat aamma nunarsuarmiut tamatumunnga atasumik qanoq iliortariaqarnerat sakkortuumik oqallisaapput. Ilisimatuut tamarluinnangajammik allanngornernut inuit pissutaatippaat, pingaartumik nukissiorfiit nukimmillu atuinerup gassit kissapiloortitsisut aniatinnerulermatigit. Ilisimatuut ikinnerpaat allatut eqqarsarput.
Aallarsallarutta uninnaveerlutalu
Inuit uumasullu assigiinngitsunik klimalinniittut allanngornernut naleqqussarsinnaajuarsimapput, allaat ukiut sermersuaqarfiuppata taamaanngippalluunniit. Nutaartaavoq inuit pissutaasunut ilaanerat ilimagisaraluamillu sukkanerusumik pisoqarnera. Nunarsuarmi klimaasut imminni pissusitoqaat allanngortitaasinnaavoq. Ajuissumik ingerlaaseqalersinnaavoq, naggatigisinnaallugu tipping pointimik taasaq, tassa allanngoriartornerup sukkatsikkaluttuinnarluni allarpassuit nassatarissagai unitsitassajunnaarlunilu.
ACIA’p IPCC’llu naliligaat eqqumaffissat
Qanga, maanna, siunissamilu klimap allanngorarnerisa ilisimatuutut nalilernissaannut IPCC, FN’s Klimamik sassartitai, pinngitsooratik paasisimasaqarluarput. IPCC’p naliliineri kingulliit ACIA’mit Arktisk Rådip IPCC’mut sanilequttatut pilersitaanit isummerfiusunik ilallugit uani nittartakkami tunngavigaagut. Bella Centerimi Københavnimiittumi 2009 marsiugaa ilisimatuut klimalerisitsineranni isummiutit kingulliit ilanngussanut ilaapput.
Kyoto, København – Kalaallillu Nunaat
Nunarpassuit Kyotomi isumaqatigiissut, taamalu gassit kissatsipiloortitsisut atunnginnerulernissaannik pisussanngorteqatigiinneq, politikkikkut tapersersorpaat. Kyotomi isumatigiissut 2012’imut atasussaavoq, FN’illu 2009 decembariugaa ataatsimeersuartitsinissaani politikerit pisussaaffiusunik nutaanik isumaqatigiissuteqaqqunaqaat. Taamaaliornissaat Namminersorlutik Oqartussat pingaartilluinnarpaat. Tamanna pillugu suli uani.